Haraldur H

17.6.2008 | 09:32

Hefðbundin fjallafærsla

Eins og lesendur hafa kannski tekið eftir þá er stefnan hjá mér að labba það sem kallast 24/24 í sumar ,nánar þann 12 júli (sjá www.glerardalur.is )

Það er sem sé ganga á 24 tinda á 24 tímum.

Til að ganga svoleiðis göngu þarf maður að vera í þokkalegu formi og við fórum saman 3 félagarnir í æfingagöngu í gær .

Reyndar ætlar bara annar þeirra með mér norður en hinn mætti til að veita móralskan stuðning og auðvitað var það vel þegið :)

Gengum upp milli Þverárdals og Skánardals ,yfir Laufskörð og þaðan eftir Esjunni endilangri inn á Hábungu og svo niður á Þverfellshorn þar sem bættist við einn göngugarpur.

Ég get alveg sagt að Laufskörð voru fyrir mína parta léttasti hluti leiðarinnar þó að þau séu kannski ekki fyrir mikið lofthrædda, þá var þó gott undirlag þar til að ganga á ,annað en annarstaðar á leiðinni því aðra eins göngu hef ég aldrei gengið .

Það var búið að segja mér að Esja væri grýtt í toppinn en svona stórgrýtt datt mér aldrei í hug og ef ég hefði verið einn á ferð þá hefði ég farið niður Þverfellshornið hikstalaust .

En ég var ekki einn á ferð og það ætlaði fólk að koma á móti okkur upp Blikdalinn og sem betur fer er leiðin frá Þverfellshorninu og að Kerhólakamb mun léttari en frá Laufskörðum að Þverfellshorninu.

En þetta var það eina sem skyggði á gönguna því félagskapurinn var eðalfínn ,samskiptin við það fólk í bænum sem vissi af okkur ekki síðri og það að fólk væri að príla á fjallið til að veita okkur stuðning er auðvitað ómetanlegt .

Vorum komnir niður í Blikdal nákvæmlega 8 klst eftir að við lögðum af stað og Þá búnir að ganga 21,63 km og ég var eiginlega lúnari en eftir Hvannadalshnúk :) svona næstum ;)

Flokkur: Bloggar | Breytt s.d. kl. 10:13 | Facebook